04/03/2010 by marioregueira

Un novo comezo

Foron algo máis de tres anos, no vello dominio de blogger, tres anos nos que pasaron moitas cousas, entre as que podemos destacar a publicación de tres libros, pero tamén recitais, viaxes, polémicas, traballos e destraballos, proxectos que xurdiron coa forza das ilusións e caeron axiña na apatía máis tópica deste país, e tamén as derrotas políticas, tamén tópicas do país, entre treguas que nunca acabaron de convencernos. O blogue tivo os seus altibaixos e o certo é que a tentación de mudanza a blogaliza, que estivo presente dende os primeiros tempos, foi tomando o corpo dun revulsivo que permitise revitalizar as crónicas do porto e impedir o estatismo no que estaban caendo. Tamén está, por suposto, o feito de apoiar un xeito de facer as cousas que funciona e que está asociado ao país, que ao cabo é unha das cousas que máis me importan, sobre todo vendo a dificultade de artellar respostas e a capacidade que seguimos a ter de derrubarnos as escaleiras entre nós.

Estiven tentado de abandonar o blogue moitas veces, e dalgunha forma é o que fixen. En lugar de importar o vello contido, decidín comezar de cero. Supoño que en esencia o vello cronista de Gorée que xa son aparecerá nestas novas páxinas, ao mesmo tempo supoño que haberá cousas dese vello cronista que o novo rexeitará. E coma sempre haberá xente máis ou menos descontenta. En calquera caso, o porto abriu de novo, poden atracar os seus barcos e pasear pola illa e asomarse unha vez máis á porta do non retorno.

#Cotidiano

Comments

  1. FraVernero
    04/03/2010 - 08:33

    Pois adiante coa nova singladura! E que sexa tan fértil e productiva coma o Palenque que deixaches na Illa de Gorée…

  2. Lau
    04/03/2010 - 09:31

    Pois… Benvido de novo a bordo…
    Coma sempre, seguiremos o teu rumbo dende a escuridade!
    Bicos

  3. albixoi
    04/03/2010 - 10:30

    Parabéns polo novo comezo. Que as musas che sexan propicias.

  4. Mr Tichborne
    04/03/2010 - 11:24

    Pois benvido! Eu lembro que sempre me falaches ben do traballo de Blogaliza cando eu estaba pensando en mudarme, e en troques non dabas o paso. Feliz nova (vella, a mesma) singradura!

  5. Antuán
    04/03/2010 - 14:09

    Coraxosa singradura, nestes tempos de facebook… Sen dúbida é unha grande noticia. Aquí nos terá agardando, ansiosos…

  6. Sak
    04/03/2010 - 17:50

    Blogaliza merecia que este blogue estivera nela e moitos, merecéndoo ou non, gostamos inmenso de lerte.

    Apertas e obrigado por voltar!

  7. ekis1331
    05/03/2010 - 15:02

    Alédame a túa volta. Fermosa fotografía.

  8. FraVernero
    06/03/2010 - 17:28

    De todos xeitos, fixeches mal, ao meu ver, en borrar as entradas da vella bitácora, home. O pasado é bo que fique, coma un torre (ou no noso caso, porto) evanescente…

  9. ghanito
    07/03/2010 - 00:54

    Que inmenso pracer atoparte na Blogaliza 🙂

  10. Mario
    07/03/2010 - 11:50

    Graciñas a tod@s por esta benvida. Sobre algunhas das cousas que se dixeron aquí:

    – Blogaliza: o meu apoio ao proxecto vén de moi atrás, por ser galego e por gostar do xeito no que fan as cousas. As razóns polas que non me mudei antes foron simplemente a preguiza, nos primeiros tempos porque xa o blogger me esixira tempo para saber fozar nel e non quería pasar outra vez por ese proceso de aprendizaxe tan axiña, ultimamente porque non atopaba tempo para facer a migración dun xeito convincente. Como curiosidade, este dominio de blogaliza collino hai case un ano, imaxinade.

    – Os vellos arquivos do blogue. Sinto pola parte na que moitos comentarios de amig@s quedaron borrados, porén eliminar o vello blogue era algo que precisaba simbolicamente para comezar unha nova etapa. Ao mesmo tempo, Fra, hai a longo prazo un certo experimento especulativo niso, teño curiosidade por ver como se relacionará a memoria d@s lectores, e tamén a do campo literario, con toda esa inxente cantidade de textos, e a forma na que tratarán (ou non) de recuperalos.

    Tamén quero advertir sobre a reforma das ligazóns con respecto ao vello blogue. Fun deixando fóra aqueles blogues que levaban tempo sen actualizar, algúns moi míticos e de bos amigos, pero que hai máis de seis meses que non dan sinais de vida. Se algún deles decide volver que me avise e o reintegrarei co maior pracer ao meu blogroll. Tamén é posíbel que esquecese algún no lío da mudanza, así que é só avisar se reparades nalgún lapsus.

    Obrigado de novo a toda a xente que segue aí, ao outro lado 🙂

  11. Manuel L. Rodrigues
    07/03/2010 - 12:42

    Benvido de novo á rede, Mario. Unha aperta.

  12. Mr Tichborne
    10/03/2010 - 00:11

    Podes correxir a ligazón ó meu blogue? Ligaches o antigo de blogspot e non o novo de blogaliza (eu tamén son un desertor). Grazas!

  13. Mario
    10/03/2010 - 02:30

    Feito! E non ha de ser o único erro, nin o máis grande, xa verás.

Comments are closed.

; >

Este sitio web emprega cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, pinche na ligazón para máis información.plugin cookies

ACEPTAR
Aviso de cookies